出席問題

關於球隊上下既出席問題，其實一直都係球隊既最大問題所在，由我接手返球隊事務開始，我係親自打俾每一個隊友直接咁問大家究竟有無心繼續踢呢隊波。不論答案係踢同唔踢都好，我都同每個人講無所謂既，唔會傷大家感情，大家都係成年人，有心繼續踢既我當然開心，亦都希望可以一齊努力攪返好隊波。就算當初真係有人答我唔想既話，我認為都唔會有咩問題，最緊要大家攪清楚，如果係既最多比賽或者其他唔預，有友賽咪搵埋一齊玩。最緊要大家知我要求既係咩，而你接唔接受呢。
睇返而家球隊呢2、3個月既運作，我自己覺得係有改善既，但係最大問題依然係大家既出席問題。其實而家球隊係通知大家有賽事方面，我覺得都做得幾好啦，球隊網頁、facebook同sms通知，再加埋電話再聯絡大家confirm，基本上一有最新賽程，我地就第一時間通知，呢方面我地已經做得比好多球隊都要好。但係球隊係呢方面，係出席呢一個問題上依然未如理想，究竟係咩原因？

友賽成日都7個8個....跑足個幾鐘....

其實都係一個電話，答一句去定唔去，大家都係成年人，咁簡單既野都決定唔到咩？就好似朋友幾日前約去玩，呢d就可以預定時間mark定簿，踢波就唔可以？其實預到時間到咪講聲到囉，預唔到有咩事真係唔敢答實既咪直接話唔好預住囉，等我地可以預到有幾多人到，場波踢唔踢到，真係應承左臨時有事咪通知聲囉，唔通我地唔俾有事咩。球隊唔係一、兩個人架，係全隊上下都有份，我希望大家可以俾d心落去，有d交帶

係咪因為我地大部份人都唔知當日收唔收到工呢..?
加上有d人又要上堂....
仲有陳仔果d又成日覆唔實~

我想講既係陳仔其實好有交帶，佢次次都有覆我，有時仲係主動搵我
而另外兩個解釋，我自己就覺得唔算合理，我相信返學果d一早就有日子架啦，至於返工既，我相信大家都做左野有幾年起碼，自己收工時間係點，若果有機會ot既，ot要o幾耐，我相信點都會有個預算嘛，都係一樣得咪得，唔得咪講聲我地知唔得囉，我地唔係強迫性架，我地都係想得個知字

咁我諗大家都會盡量配合ge///下次比賽再講一講囉~~~
大家會合作~~~睇下點先會好d ge~~

我同阿盛佢都傾過下，睇多幾場友賽咩情況先啦，因為相對黎睇，其實比賽就少機會有咁既情況發生，睇返次次都係友賽先咁，因為初初就大家都想有多d友賽踢，咁大家可以夾下練下，但係如果情況係咁既話，我可能就唔再搵友賽喇。
始終友賽，其實我想講唔係容易搵架，大家要知我地無場紙，一定係搵人地d場去踢，但係我「阿芳」唔係大晒，唔係講聲就得。比賽唔夠人，取消都係罰錢，賽會無所謂架，但係友賽我地要同對手交代，我地唔夠人取消，人地又搵唔搵到人頂我地，又或者我地夾硬既，又踢到無癮，而且呢2樣野發生，人地下次仲會唔會搵我地，我地聯和青年個名又臭晒咁，有咩謂？
其實有d野唔係必然有，爭取返黎其實係好困難，我明白有時友賽通知大家可能比較急，但係我地都無計，我地都已經第一時間通知，始終呢樣野除左係我地自身問題之外，亦都係需要同其他球隊交代，如果情況係繼續既話，咁唯有唔搵友賽算喇，球隊係需要整體，而唔係幾個球員出席就足夠，對某d隊友可能算叫倣唔公平，但係要以整體運作為依歸，所以都要睇返整體因素喇。